Aperaquí 3000 personas manifestèron dissabte per las carrièras de Baiona en reclamant de politicas lingüisticas per la lenga basca. “Per que lo basco visca, avèm de besonh de passar a un novèl cicle dins la politica lingüistica publica”, çò diguèron sus l’empont al final del cortègi los representants d’Euskal Konfederazioa, la federacion de las uèch principalas associacions per la lenga basca. “Las politicas minimalistas son ineficaças”, çò precisèron, segon Mediabask.

Dobrissián o cortègi los collegians que venián d’arribar de Bordèu en bicicleta. Partiguèron lo dimars 18 d’abril amb la revendicacion del drech de passar lo brevet dels collègis entièrament en basco.

Los manifestants remembrèron que la darrièra enquista sociolingüistica indica que, malgrat una pichona pojada del percentatge de locutors joves, l’usatge social e lo nivèl lingüstic dels bascofòns son a descréisser. Per o redreiçar reclaman que los poders publics —estat, region, departament e comunautat d’aglomeracion— passen “d’una politica de responsa a la demanda sociala, a una politica de l’ofèrta generalizada dins totes los domenis”.

Enfin, los representants d’Euskal Konfederazioa reafirmèron lor volontat de participar a un contracte amb l’estat coma lo que l'a signat amb d’autoritats regionalas pel breton e l’occitan.

Hizkuntza politika indartu !

Euskarak bizi behar du !#euskara#Baiona#EuskalHerriapic.twitter.com/MdyMXqQKIC

— Ibai Agirrebarrena (@iagirreb) April 22, 2023