Jutjaràn dotze activistas independentistas catalans per "terrorisme". Foguèron arrestatss en 2009 e plaçats en preson preventiva, puèi los remetèron en libertat per manca de pròvas e, e dos ans pus tard,  los jutges clavèron l’enquista en reconeissent qu’èra pas brica clar quin èra lor delicte. Ara, un tribunal de Madrid especializat en terrorisme torna dobrir l’afar e seràn jutjats per aquel delicte presumit.

Dotze dels tretze activistas independentistas catalans —que 9 d’eles los detenguèron dins la davalada de 2019 dins una operacion mediatica e espectaclosa nomenada “Operacion Judàs”— son doncas considerats per un tribunal espanhòl coma de terroristas. Nòu dels acusats son tanplan jutjats per aver agut e fabricat de substàncias perilhosas e de dispositius explosius “de caractèr terrorista”. Coma son acusats de “terrorisme”, lo procès se ten a l’Audiéncia Nacionala espanhòla, un tribunal d’excepcion especializat en aquela sòrta de crime e delicte.

Los avocats dels dotze activistas, del collectiu Alèrta Solidària, plaidejan que son en situacion grèva de non-defensa,  compte tengut del fache lo jutge lor a pas porgit tota la documentacion de l’afar.

De produches de netejatge abituals

L’enquista dobèrta en 2019 contra eles  foguèt complètament descreditada dos ans apuèi, quand los jutges reconeguèron qu’èra pas brica clar per quin delicte l’enquista de la Gàrdia Civila èra estadas dobèrta. Al moment de las arrestacions, se mobilizèt 500 agents de la Gàrdia Civila, se faguèt 10 escorcolhs d’ostals dins 7 vilas de Catalonha. Los detenguts los menèron en preson preventiva a Madrid, en regim reservat als terroristas, fins que, qualques meses pus tard, los metèsson tornarmai en libertat per manca de pròvas. Los mèdias espanhòls ne parlèron en fasent creire qu’avián trobat dins los ostals dels detenguts de produches per fabricar d’explosius, qu’en realitat èran de produches de netejatge abituals dins un domicili. Ara, totun, l’Audiéncia Nacionala espanhòla a tornat dobrir l’enquista.

Lo jutge instructor de l’afar assegura que los acusats an en comun “de principis ideologics favorables a l'independéncia e l’activisme radical per la capitar”. A mai, lo magistrat assolida que la tòca dels acusats èra “de pervenir a l'independéncia de Catalonha, en emplegant la violéncia dins son expression màger, en forçant, de manièra coercitiva, las institucions de concedir per la via dels faches la separacion de Catalonha de la rèsta d’Espanha.”

Los dotze acusats son David Budria, Clara Borrero, Xavier Buigas, Alexis Codina, Edu Garzón, Ferran Jolis, Jordi Ros, Germinal Tomàs, Esther Canet, Sonia Pascual, Queralt Casoliva e Rafael Delgado. Xavier Duch, inicialament detengut, foguèt exclús de l’enquista per de rasons de santat.

Trailer del documentari  DE MATINADA