Lo govèrn del Curdistan meridional, dins l’estat iraquian, a anonciat qu’aculhiriá la CONIFA, la Copa del Mond de la confederacion de las seleccions de las nacions sens estat. Lo torneg , que començarà d’aicí a un an, comptarà sus la participacion de setze seleccions e ja an anonciat las partidas de la fasa de classament.

Las partidas de la CONIFA se jogaràn dins los estadis de las principalas vilas, coma Silêmanî, Irbil, Duhok e Zakho. La region curda foguèt ja lo sèti d’un mondial similar en 2012 ont participèt la Seleccion Occitana de Fotbòl, qu’arribèt als quarts de finala.

La CONIFA se creèt en 2013 e sa primièra copa del Mond se tenguèt en junh de 2014 a Östersund (Lapònia). Ganhèt la seleccion de fotbòl del Comtat de Niça, dicha la “Seleccion” (“Selecioun” en grafia prenormativa). Tanben i participèt la seleccion nacionala d’Occitània.

Dempuèi alavetz an agut luòc tres copas del Mond masculinas e antan se faguèt la primièra copa femenina que la ganhèt la seleccion del pòble sami. Ara per ara, la competicion compren 38 pòbles sens estat coma Sardenha, Cabilia o Hawaii, e de minoritats nacionalas coma los coreans de Japon, los ongreses de Romania o lo pòble ròm. Occitània i participèt qualques annadas. Pasmens, la darrièra informacion qu’avèm de la Seleccion Occitana de Fotbòl es de 2020 quand cercava d’esponsors per participar a la copa d’Euròpa de las minoritats.