En collaboracion amb Ràdio Occitània, Jornalet prepausa cada dimenge una entrevista àudio del podcast de la ràdio tolosana. Aquesta setmana, retrobam l’entrevista del cantador provençal Enric Maquet que presenta un projècte polifonic sonat Trivia amb las cantadoras Emmanuelle Aymès, Lutxi Achiary e Elisa Testa.

Al començament i a la votz… Es lo mot d’òrdre tot simple dels quatre sòcis del quartet polifonic Trivia que recampa Enric Maquet, Emmanuelle Aymès, Lutxi Achiary e Elisa Testa. En residéncia per quatre jorns al CERC de Pau, meton un còp d’accelerador per poder “carrejar e partejar d’estructuras de pensada al delà del lengatge”. En clar: donar un ponch de vista sul Mond per mejan del cant en occitan. Amb l’arlatenc Enric Maquet, la còla de Ràdio Occitània s’es esforçada de veire dins quina direccion vòlon anar los artistas.