Una Escòcia independenta poiriá accedir rapidament a l’Union Europèa, seriá una mèra formalitat e se poiriá far de la nuèch al dia. Aquò, o an explicat de deputats e representants dels principals partits daneses, tant del govèrn coma de l’oposicion, al collectiu escocés National Collective (Collectiu Nacional), qu’aplega d’artistas e de creators favorables a l’independéncia d’Escòcia. Aquela entitat a publicat un reportatge amb aquelas declaracions, que contradison las qu’aquestas darrièras setmanas avián fach de representants unionistas dempuèi la campanha Better Together (Melhor Ensems). Las voses que reculhís aquel reportatge dison, e mai, qu’a Danemarc l’interessariá una Escòcia independenta dins l’UE.
Lo deputat Rasmus Helveg Petersen, pòrtavotz dels afars estrangièrs dels socialliberals, que fan partida del govèrn danés, ditz: “Lo critèri es fòrça objectiu. Escòcia i entrariá [dins l’UE]. S’Escòcia o vòl, òc. Seriá una mèra formalitat.” E recòrda en aquel sens que la Declaracion de Copenaga de 1993 es estada la guida per l’adesion de membres nòus de l’UE. “Lo critèri ditz que los membres que vòlgan èsser membres e que sián aprovats, seràn membres.” E li demandan s’Escòcia compliriá los requisits per entrar. “Òc. Los critèris son fòrça objectius. Escòcia los compliriá.”

Jakob Ellemann-Jensen, pòrtavotz dels Afars Europèus de Venstre, lo partit majoritari al parlament danés, ditz: “En cas qu’Escòcia votèsse en favor de l’independéncia, seriá tan natural per Danemarc d’o reconéisser e de donar la benvenguda a Escòcia dins l’UE e l’OTAN.”

Lo reportatge reculhís qualques autras opinions, coma la de Lars Bo Kaspersen, director de sciéncias politicas a l’Universitat de Copenaga, que ditz que l’adesion d’Escòcia a l’UE interessariá Danemarc. “Soi segur que l’Union Europèa en general sostendriá l’entrada d’Escòcia, e çò meteis se passariá amb l’OTAN. Pòdi pas pensar que qualqu’un creguèsse qu’es pas una bona idèa”, çò afortís Kaspersen.