Actualitats
La bandièra francesa al 'Castellet' de Perpinhan
L'administracion francesa impausa la bandièra tricolor lo 14 de julhet e lo 8 de mai
Sul monument istoric de Perpinhan i a normalament la bandièra catalana. L'administracion francesa vòl impausar la bandièra tricolor lo 14 de julhet e lo 8 de mai. Mas lo 14 de julhet i pòt pas èsser a causa dels fuòcs d'artifici e lo 8 de mai normalament i es.
Sul Castellet i a tostemps la bandièra catalana qu'ondeja. Pas gaire luènh, sus l'edifici de la Prefectura, ondeja una bandièra francesa mai nauta e mai granda que la catalana del Castellet. Mas aquò es pas pro per l'administracion francesa qu'impausa, ara, la bandièra tricolor al costat de la catalana sus l'emblematic monument catalan.
Jaume Deloncle, conservador del musèu La Casa Pairal plaçat dins lo Castelletexplica al jornal El Punt-Avuique “l'edifici es integrat dins l'administracion dels Monuments Istorics de França e es aquela administracion qu'impausa que lo 8 de mai la bandièra francesa ondege tanben aicí”.
Lo 8 de mai, data que los franceses i celèbran la fin de la Segonda Guèrra Mondiala, es una de las fèstas mai patrioticas de l'Estat amb lo 14 de julhet.
La bandièra francesa “auriá d'ondejar tanben obligatòriament, segon los franceses, lo 14 de julhet” explica al meteis jornal Jaume Roure, president d'Unitat Catalana e conselhièr de la Comuna de Perpinhan responsable dels afars catalans. Mas en aquela data la bandièra tricolor es pas sul monument “perque los fuòcs d'artifici se lançan dempuèi lo Castellet e aquel jorn i a pas cap de bandièra per rasons de seguretat” a confirmat Deloncle.
De representants de la Comuna de Perpinhan an confirmat al jornal El Punt-Avui que pendent lo 8 de mai lo drapèl tricolor es sul Castellet.
Lo Castellet, apelat tanben Castell menor o Castillet, es un dels monuments mai importants de la vila de Perpinhan (Païses Catalans). Foguèt pòrta de la vila e preson d'estat. Acuelh lo Musèu Catalan dels Arts e Tradicions Popularas (La Casa Pairal) e manten totjorn alucada la flama del Canigó.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Non pensi cap qu'aus Perpinhanés, la preséncia de la banèra francesa suu "castellet" e pause lo mendre problèma. Qu'èm au nòrd, la problematica n'ei pas la deu sud. Los catalans deu nòrd que's senten catalans E francés sense sentiment conflictiu per ua gran majoritat.
En un monument, coma lo Castellet de Perpinhan, es normal que aja tot l'an lo drapèl catalan. Perpinhan es catalan e mai tot lo Departament dels Pirinèus Orientals, coma tanben son catalanes las provincias de Girona, Lleida, Castelló, València, Alacant e Illes Balears.
Totes aquestes territòris foguèron espeçat pendant los sègles XVII, XVIII e XIX.
Felip de Borbon, eretièr de Carles II d'Habsburg, aviá promés l'an 1701 las constitucions catalanas reculhidas per Lluís de Peguera, que comprenián lo nomenclator de pòbles, vilas e ciutats a que fasián referencia aquelas constitucions e los territòris del Departament dels Pirinèus Orientals èran compresas en aquel nomenclator pr'amor que lo tractat dels Pirinèus de 1659 èra estat pas ratificat encara per las Corts Catalanas (e encara es estat pas ratificat uèi).
L'an 1703, Felip de Borbon foguèt destronat mas ocupèt militarament coma rei de Castelha la part que ara es espanhola. Ocupèt pas los Pirinèus Orientals, assajèt d'ocupar Sardinnia l'an 1730 mas foguèt fòrabandit e lo drech cantalan contunhèt ailà en vigor.
A mon vejaire, es pas rasonable que la Republica Francesa vòlga impausar per la força un drapèl qu'es pas tradicional en aquel luòc e en contra de la volontat de los ciutadans e los sabents.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari