Lo govèrn italian de Giorgia Meloni aprovèt un nòu decret del trabalh lo 1r de mai passat dins un conselh dels ministres extraordinari. La tòca de la nòva lei, segon l’executiu dominat per l’extrèma drecha, es d’encoratjar l’emplec e de reduire los impòstes. Entre las autras mesuras, lo decret suprimís lo “revengut del ciutadanatge”, una ajuda que ne benefícian de milions de personas pauras, e lo remplaça per un“chèc d’inclusion” que pertocarà las familhas de pauretat extrèma, los andicapats e las personas d’edat avançada. Lo decret tanben vòl demesir las contribucions fiscalas dels revenguts inferiors a 35 000 èuros per an.

“Me senti fièra que lo govèrn aja decidit de festejar lo primièr de mai amb de faches e non pas amb de paraulas”, çò diguèt Meloni dins un vidèo, pr’amor que faguèt pas cap de conferéncia de premsa.

Quant a la reduccion fiscala, s’establís precisament pels salaris de mens de 25 000 èuros annadièrs entrò la fin de 2023. A mai, s’inclutz de reduccions fiscalas a las societats que prepausaràn de contractes de durada indeterminada e a las qu’estabilizaràn los contractes temporaris. Aquestas mesuras seràn finançadas amb un escart budgetari de 3,4 miliards d'èuros en 2023 aprovat qualques jorns abans pel parlament, dins lo Document d'Economia e Finanças (DEF).

Los sindicats an criticat la mesura, e sustot la data causida per l’anonciar.