En Naut Carcin, tot es lèst per l’ochena seisena edicion del festenal Escambis, l’eveniment de cultura occitana de referéncia. Après sèt ans de reüssidas, l’edicion d’ongan se tendrà del 26 al 28 de mai, a Sant Seren, a Banas e a Sant Joan de la Ginèsta. Lo festenal Escambis es organizat per l’associacion Aquí l’Òc, e receb lo sosten de Jornalet.

Aquel festenal en Carcin a la particularitat de s’adreiçar a un public larg: los que parlan occitan o non, los que son d’aicí o non... Tradicion e modernitat se conjugan per far descobrir e partejar nòstra cultura e nòstra lenga. Joves e mens joves se retròban dins de domenis tan variats coma lo cinèma, la musica, la dança, l’artisanat, la literatura, la poesia, l’istòria o lo conte.

Ongan, lo festenal comença lo divendres 26 de mai amb l’umor de Clamenç a l’Espaci Occitan Carcinòl de Sant Seren. L’endeman, es la vila de Banas —a 13 Km. al sud de Sant Seren— qu’aculhirà d’animacions, de taulièrs, d’exposicions, de jòcs, una passejada, de petanca, de dialògs, etc. Al programa i a un repais (jos reservacion prèvia) e un concèrt-balèti amb Las Domaisèlas e Mbraia. Enfin, dimenge 28 de mai a Sant Joan de la Ginèsta se tendrà una conferéncia musicala amb l’AMTP de Carcin e doas pèças de teatre amb la tropa de Montuc

Per mai d’informacion, podètz telefonar al +33(6) 73 62 64 63, o ben escriure a asso.aquiloc@gmai... Trobaretz mai d’entresenhas e lo programa complet en linha sul sit espacioccitancarcinol.com.