Almens uèch ciutadans mòrts e tretze nafrats es lo tragic bilanç d’una fusilhada que se passèt dijòus de ser a Dubona, en Serbia. Lo presumit atacaire, ja detengut, es identificat coma Uroš B., un gojat de 21 ans, qu’après una discussion amb un policièr anèt devèrs son ostal, prenguèt un fusilh e un pistolet, e comencèt lo masèl. Las victimas aurián totes entre 14 e 23 ans, çò rapòrta Novosti.

Uroš B. prenguèt la veitura, davalèt, tirèt sus un grop de personas que picanicavan, e tornèt prene la veitura per fugir mentre que contunhava de tirar d’un biais indiscriminat. Tanben faguèt servir sas armas dins lo vilatge de Sepsin, près de Dubona. Demest los mòrts i a lo policièr amb lo qual aviá discutit e sa sòrre.

Se tracta de la segonda fusilhada mortala en Serbia en tres jorns. Dimècres, un escolan de 13 ans tuèt uèch escolans de sa classa e un agent de seguretat a l’escòla primària Vladislav Ribnikar, a Vračar, près de Belgrad. Se serviguèt de dos pistolets de son paire.