La Societat Catalana de Sociolingüistica, filiala de l’Institut d’Estudis Catalans (IÈC), a publicat una declaracion per denonciar l’ofensiva politica contra la lenga catalana de la part d’Espanha e a demandat als organismes e a las societats scientificas que manden de reclamacions a l’UNÈSCO e al Conselh d’Euròpa, e que i transmetan aqueles faches per fin que “metan en examen, e se cal, condemnen formalament” las politicas que “cèrcan de manièra exprèssa e continua de prejudicar la lenga catalana”. La declaracion, al nivèl informatiu, denóncia tanben que se complís pas los tractats internacionals qu’obligan de respectar la diversitat culturala e lingüistica dels parlants de las lengas minorizadas.

Lo manifèst denóncia qu’Espanha ferís l’esperit dels dreches fondamentals a la diversitat culturala contenguts dins l’ordenament juridic internacional e qu’agís contra la mission de l’UNÈSCO de “crear de condicions propícias per un dialòg entre las civilizacions, las culturas e los pòbles fondadas sul respècte de las valors comunas”.
 
Lo tèxt explica las politicas de l’estat espanhòl, coma lo projècte de lei d’educacion del ministre Wert e las politicas dels govèrns valencian e balear contra la lenga catalana. Del govèrn balear, soslinha que fa pression suls parents e suls professors per que s’aumente l’usatge del castelhan dins las escòlas e qu’a eliminat lo requisit de la coneissença del catalan pels foncionaris de l’administracion, del temps que del costat valencian, denóncia que sonque 25% de las familhas qu’o demandan an un ensenhament en catalan per lors enfants.
 
En mai d’aquò, la declaracion alèrta que lo govèrn valencian a promogut pendent fòrça ans la consideracion del “valencian” coma lenga separada del catalan e que non reconeis pas lo diplòma universitari de filologia catalana; tanben parla de la recenta denominacion de LAPAO per lo catalan que se parla dins l’airal oriental d’Aragon.
 
D’un autre costat, la Societat Catalana de Sociolingüistica demanda al Conselh d’Euròpa e al sieu Comitat d’Expèrts que, davant la presentacion del quatren rapòrt sus l’aplicacion de la Carta Europèa de las Lengas Regionalas o Minoritàrias, estúdien “d’un biais meticulós” las politicas dels govèrns autonomics a prepaus del catalan.