Despuei lo 25 de junh, Télé Locale Provence (TLP, eslogan: “La TV au soleu”) emete plus. TLP èra una chaena de television generalista e regionala difusant per TNT dins la mitat dau departament de las Aups d’Auta Provença (l’Auta Provença de Manòsca fins a Forcauquier, Aurason e fins au començament de la Gavotina de Vorona a Sisteron) e tanben captabla dins un espaci mai ample per cable, satellit e de pertot per Internet (ADSL).
 
Aquela television aviá per tòcha de far parlar lo monde dau país e de presentar çò que s’i faiá. Èra una de las raras televisions regionalas a ges esitar d’entrevistar la realitat dau país: de gents parlan amb un accent occitan de la vida quotidiana. L’occitan tressuava d’aquela television, quitament s’èra gaire evocat en se, e quitament se los presentators èran pas totes dau caire. Tota paraula aviá sa plaça sensa jutjament e ren semblava “copat au montatge”.
 
Despuei abriu, TLP fa part de l’entitat “Médias du Sud” (qu’a las televisions regionalas La Chaîne Marseille [LCM], TV Sud Camargue-Cévennes [Nimes] e TV Sud Montpellier). L’objectiu de Médias du Sud es d’establir un grop de televisions regionalas dins lo sud de França. Mas coma lo grop èra degunament interessat per continuar l’esperit de la chaena locala, partent de setembre de 2013, La Chaîne Marseille (LCM, eslogan: “Vivètz aicí, LCM tanben”; qu’es una chaena de television generalista regionala difusaa dins las Bochas de Ròse, principalament l’aglomeracion marselhesa e sextiana) la deuriá remplaçar tot en precisar qu’existirà una rubrica d’emissions dedicaas a las Aups d’Auta Provença. Veirem ben la plaça qu’aurà lo francés parlat amb l’accent occitan e quitament lo francitan (francés amb d’expressions occitanas francizaas) sus aquela chaena. Ò benlèu —o chal esperar— veirem una emission en occitan coma se fa sus una autra chaena, TV Sud Camargue-Cévennes, dau mesme grop.
 
 
 
 
Laurenç Revèst