Coma cada 3 de mai, a partir de 1323, l’Acadèmia dels Jòcs Florals de Tolosa a recompensats los melhors poètas en francés e en occitan. Ongan, una cinquantena d’obras en occitan son presentadas al concors literari mai ancian del Mond occidental. De soslinhar l’entronizacion de las poetessas Aurelia Lassaca e Paulina Kamakine coma mestressas dels jocs de l’Acadèmia dels Jòcs Florals: “La poesia qu’ei lo fondament de la nosta istòria e civilizacion, que soi prigondament segura que serà tanben la beutat qui sauvarà la nosta lenga occitana”, çò declarèt Kamakine davant las camèras de France 3.

Dijòus passat, a l’endeman de la ceremònia dels prèmis, se tenguèt una vesprada poetica a l’Ostal d’Occitània amb la participacion, demest plan d’autres, d’Alem Surre-Garcia, d’Eric Fraj, de Gerard Zuchetto, de Paulina Kamakine, de Franc Bardòu e de Muriel Batbie-Castell.

Ongan, l’institucion literària occitana, fondada per sèt trobadors a Tolosa, festeja son 700 anniversari amb l’intrada dins l’inventari del patrimòni immaterial de França. La primièra ajusta poetica aguèt luòc lo 3 de mai de 1324, jorn de la fèsta de las flors, amb lo sosten dels capítols de Tolosa. Lo primièr laureat foguèt Arnau Vidal de Castèlnòu d'Arri amb un poèma dedicat a la Verge Maria. Aquel eveniment es immortalizat sus un tablèu monumental expausat dins l'escalièr del Capitòli de Tolosa.

E l’an que ven una novetat importanta: l’acadèmia tolosana consagrarà un dels prèmis a l’slam, considerat coma un vector de “democratizacion de l’imatge de la poesia demest los joves”.