De comissaris de l’Union Europèa aurián acceptat de viatges e d’albergaments gratuits de part de govèrns d’estats fòra de l'Union, coma Qatar, Jordania, Ozbequistan, Marròc e Israèl, segon una enquista de Politico. Aquela practica es pas enebida mas fa fòrça sospechar las influéncias que las pòdon exercir los govèrns d’aqueles païses sus l’Union Europèa, mai que mai après l’experiéncia del Qatargate.

L’enquista mençona lo naut representant pels afars exteriors e la seguretat, Josep Borrell, lo comissari per l’alargament e lo vesinatge, Olivér Várhelyi; lo vicepresident executiu Frans Timmermans, la comissària d’afars intèrnes, Ylva Johansson; lo comissari del budget, Johannes Hahn; lo vicepresident e comissari de las valors europèas, Margaritis Schinas; e la comissària de l’energia, Kadri Simson.

En seguida, la Comission Europèa a dich que Borrell deu far fòrça viatges fòra de l’UE per las obligacions de sa carga mas que “las despensas d’aquelas missions son estadas cobèrtas sustot per la Comission”. A prepaus de Qatar, Ozbequistan e Jordania, ditz que “lo lotjament es estat pres en carga per las respectivas autoritats nacionalas segon l’espitalitat diplomatica”.

Pasmens, l’ONG Transparéncia Internacionala reclama que se meta lo ponch final a aquelas practicas per evitar d’abuses e mai d'escàndols.

Justament, fa qualques setmanas que lo director general dels transpòrts, Henrik Hololei, demissionèt quand se faguèt public qu’aviá acceptat un viatge d’avion en primièra classa de part de Qatar Airways. A mai, o faguèt mentre que se negociava l’intrada de l’aerolinha a l'ensems dels aeropòrts de l'Union Europèa. Totun, Hololei foguèt pas licenciat mas ara es estat nomenat conselhièr de la direccion generala de la cooperacion internacionala.