Tròba Vox ven de publicar L’Àngel que Renais, un libre de poèmas de Paulina Kamakine e de Franc Bardòu escrich a quatre mans. Una òbra nascuda qu’a per tòca “de denonciar l’illusion, lo mal, lo patiment que ne seguís sense jamai cap de rason valabla”, çò dison los autors dins l’introduccion, en tot precisar qu’es a “partir de l’injustícia consubstanciala del mal” que L’Àngel que renais lor espeliguèt “entre las mans un ser de julhet a Tolosa” e que l’an “reculhit dins lo clòt nafrat” de lors mans. “A l’existéncia, l’art rend justícia”, çò precisan.

Paulina Kamakine es una poetessa bigordana qu’escriu tanben de contes, legendas, romans, pròsas e cançons. Engatjada per la valorizacion e la defensa concreta dels patrimònis literari, cultural e artistic occitans, a editat una antologia de 36 poetessas occitanas contemporanèas, Paraulas de Hemnas (Reclams, 2020). A obtengut, demest d’autres guierdons, lo prèmi Ostana e lo prèmi Simin Palay.

Franc Bardòu es un escrivan e poèta tolosan, doctor en literatura occitana amb una tèsi sus l’òbra màger e la pensada de Renat Nelli. Interessat a cèrts ponches de vistas pro precises de Joan Jaurés, e tanben de Karl Marx, es totjorn fòrça estacat als movements altermondialistas e ecologistas. Son roman La nuèit folzejada (IDECO 2003) foguèt revirat e publicat un an pus tard en catalan amb lo títol La nit fulminada (edicions de l’Índex, 2004). En novembre de 2017, presentava en occitan per Barcelona TV lo libre Nocturnal d’Errança, que conten tota son òbra poetica d’entre 2007 i 2011.

Extrach

Anem cercar pel vent
los semens de lutz vièlha,
cuélher, cada matin
l’amor tan doç al cèl
que ven lèu per las brancas
d’albres enebriats,
quand s’escampilha a l’aire calme
d’unes sovenirs que nulòm
jamai enlòc non a viscut,
per amor qu’Amar ven primièr,
luènh davant la dolor de viure,
a l’òrle lugrejant de l’Èsser :
de l’àngel que renais
sèm los umils poètas.

BARDÒU, Franc e KAMAKINE, Paulina. L’Àngel que renais. Tròba Vox, 2023. 144 paginas. 15 èuros.

De comandar a:
TRÒBA VOX EDICIONS
2, Carrièra del Romanin
11200 MONTSERET
Tél +33(0)6 08 33 56 44
Comanda per e-mail  troba.vox@wanadoo...