ÒC Tèle e TV7 presentan lo filme Lo Rei que s’escon de Damien Lagouardette. S’agís d’una ficcion de 27 minutas tota en occitan basada sus de faches vertadièrs qu’explica l’istòria de quatre musicians que se tròban en residéncia en Maremne per fin de compausar un novèl album. Tot se passa plan quand lo comportament estranh de l’òste e l'amolonament de bruches e aparicions inexplicadas menon los quatre protagonistas al còr d’un secret plan gardat.

Demest los actors trobam los gascons Frédéric Handy, conegut sus Òc Tèle, Pèir-Arnaut Grosclaude Lapléchère, l’estela de la novèla generacion d’actors occitanofòns, e Julien Cabarry. Tanben i trobam lo cantador lengadocian Arnaud Cance e una actritz professionala, la realizaira peiregòrda Marlène Veyriras coneguda per Crimes parfaits, Scènes de ménage, etc. Apareisson tanben Jean-Luc Landi (autor e traductor) e Danielle Loustaunau.

Lo filme es produch per Loula produccions, a comptat sus 11 actors e 12 tecnicians, e es estat fach amb un budget miraclós: 15 000 èuros.