Actualitats
París: la polícia enebiguèt cinc manifestacions faissistas la dimenjada passada
Volián evitar l’imatge del vergonhable acamp nazi que s’èra tengut la dimenjada precedenta
Tèxte legit
Durant la dimenjada passada, París evitèt l’imatge de veire de faissistas a manifestar per las carrièras de la vila. La prefectura de la polícia enebiguèt cinc manifestacions, per evitar los vergonhables imatges del dissabte precedent amb de centenas de manifestants qu’exibissián de simbòls nazis.
La polícia parisenca diguèt dins un comunicat qu’aital volián “prevenir lo risc de perturbacion de l’òrdre public, las cridas a la violéncia e de consignas que pòscan remetre en causa los principis consagrats dins la Declaracion dels Dreches de l’Òme”.
De son caire, l’Assemblada Nacionala francesa aprovèt dimècres la creacion d’una comission de recèrca suls grops violents dins las manifestacions. Aquò se passèt après que lo ministre de l’Interior aguèt demandat a las prefecturas francesas de proïbir totas las manifestacions ultradrechistas après la polemica manifestacion neonazi París mençonada adès.
Se tractava d’un acamp d’environ 600 personas, la majoritat cagoladas e vestidas de negre, que portavan de nombroses drapèls nazis. L’avián convocada per commemorar la mòrt de Sebastien Deyzieu, un activista francés d’extrèma drecha francesa que moriguèt en 1994 dins una manifestacion a París contra los Estats Units.
La justícia manten un collòqui de l’Accion Francesa
Per contra, la justícia mantenguèt dissabte lo collòqui de l’organizacion reaccionària, antidemocratica e ultracionalista L’Accion Francesa, fondada a la fin del sègle XIX pel provençal Carles Maurràs. La prefectura de polícia l’aviá volgut interdire la velha.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Be cau reconéisher que la polícia francesa a empachat mantuas accions violentas de grops d'extrema dreta aquestas 5 darrèras annadas.
Per contra crear "una comission de recèrca suls grops violents dins las manifestacions" qu'ei dejà drin negar que çò qui aperam violéncias dens las manifestacions de gaucha e d'extrema dreta qu'ei hòrt diferent, que sia dens los objectius o las fòrmas de violéncias (copar veirinas d'asseguranças e de bancas e enviar projectiles aus policièrs qu'ei hòrt diferent de har saluts nazís e agressar personas per'mor que son negras, arabas o omosexualas)...
Mes bon... Be veiram! ¯\_(ツ)_/¯
En tot cas que pensi qu'ei plan de'n parlar e de préner lo problèma de l'extrema dreta au seriós (i comprés dens lo moviment occitan/gascon/provençau!)
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari