L’estat de Missori aprovèt dimècres passat, 10 de mai, una nòrma qu’enebís los tractaments medicals als joves transes e tanben lor participacion dins las esquipas esportivas de lor genre d’identificacion.

La nòrma establís que los menors transgenres poiràn pas accedir als tractaments medicals de cap de sòrta, mas los que n’avián començat qualqu’un lo poiràn totun contunhar. A mai, s’exclutz tota ajuda de Medicaid, lo programa federal d’assisténcia medicala a las personas pauras.

Amb aquela nòrma, Missori jonh d’autres 16 estats qu’an ja de leis transfòbas.

Los republicans argumentan que protegisson los enfants, e mai se l’atencion medicala d’afirmacion de genre pels menors es disponibla als Estats Units dempuèi mai de dètz ans e es sostenguda per las principalas associacions medicalas del país.

De son latz, lo representant democrata Joe Adams assegurèt que “rebutar lo suènh a aquestes dròlles es rebutar lor pròpria existéncia”.

Kansas City vendrà un santuari trans

Ara, las autoritats de Kansas City, la vila pus granda de l’estat de Missori, faràn de la vila un santuari per las personas transes de l’estat. Lo conselh municipal de tendéncia democrata a aprovat una resolucion qu’especifica que non se jutjarà ni multarà pas “cap de persona o organizacion que cèrque, prepause, recépia o ajude qualqu’un a recebre qualque atencion d'afirmacion de genre, coma de blocadors de la pubertat, d’ormònas o de cirurgia”.

D’autres santuaris per las personas transes dels Estats Units son a l’ora d’ara la vila d’Austin, en Tèxas, e los estats de Califòrnia, Minnesòta e Washington.

Segon las darrièras estatisticas, unes 300 000 enfants estatsunidencs s’identifican coma transgenres e, per tant, afrontan discriminacion, violéncias, dificultats de seguir los estudis e quitament de leis que lor refusan l’atencion medicala. Lor es enebit de participar a d’esquipas esportivas del genre que s’i identifican e quitament d’emplegar los comuns de lor genre causit.