Maria Costa, consolessa màger de Els Banys i Paladà (Catalonha), parlèt ièr en catalan al conselh municipal de sa vila. Aquò deuriá èsser un fach normal, mas ara es un braç de fèrre a la justícia francesa après la senténcia del Tribunal Administratiu de Montpelhièr d’enebir l’usatge del catalan dins los conselhs municipals de las comunas nòrd-catalanas. Un jorn abans de la sesilha, Costa aviá dich a Vilaweb que contunhariá de parlar primièr en catalan e puèi en francés, e qu’a mai apondriá “quicòm en anglés per veire s’o enebisson tanben”. De fach, ela precisa que se l’usatge de l’anglés l’enebisson pas “serà encara pus clara la discriminacion” e, per tant, auràn un autre argument quand presentaràn l’afar davant la Cort Europèa dels Dreches Umans.

Per Costa, s’agís d’una accion de “desobesissença” e se planh que las lengas minorizadas sián mautractadas e mespresadas dins l’estat francés. “Volèm que nos seguiscan los bascos, los bretons e los còrses. Se nosautres prenèm la meteissa draia qu’an seguit los autres, d’aicí a vint ans demorarà pas degun que parle catalan en Catalonha Nòrd”, çò assegura. “Soi pas d’acòrdi a far passar lo catalan per jol francés, es simplament aquò.”

Maria Costa es pas la sola que desobesirà la senténcia. De las cinc municipalitats qu’avián permés l’usatge del catalan, quatre observaràn pas lo mandat de la justícia francesa; delà Els Banys i Paladà, o faràn tanben los elegits d’Elna, Sant Andreu de Sureda e Tarerac. E lo cònsol màger de Portvendres a anonciat qu’emplegarà tanben lo catalan, mas coma traduccion del francés, que serà la primièra lenga.

Ara mateix, la batllessa dels Banys (Vallespir / Nord de Catalunya), Maria Costa, intervenint en català durant el ple municipal malgrat la decisió del tribunal administratiu de Montpeller de prohibir-ho. pic.twitter.com/oNO0nfbTSn

— Josep BONET 🎗 (@jepbonet) May 16, 2023