Aki-Matilda Høegh-Dam, deputada groenlandesa al Parlament de Danemarc, faguèt divendres passat son intervencion, d’aperaquí 7 minutas, en groenlandés e refusèt de la revirar en danés, coma o li comandava lo president de la cambra. Èra lo primièr còp qu’aquò se passava.

Dins son parladís, l’elegida pus jove del país planhiá “l’insuportabla enebicion” de parlar sa lenga dins lo Parlament e mai foguèsse oficiala. “Avèm pas pus paur de nos revoltar ni de far ausir nòstra votz en nòstra lenga. L’esperit del cambiament es arribat e lo passatge seguent serà la formacion d’un nòu estat”, çò diguèt Høegh-Dam, segon Diari de la Llengua.

Lo govèrn autonòm de Groenlàndia presentèt fa gaire lo primièr borrolhon de Constitucion al Parlament. Lo país ara es una colònia de Danemarc dempuèi 1953, mas lo groenlandès es la lenga oficiala. De fach, es la lenga veïculara a l’escòla ont lo danés es ensenhat coma segonda lenga.

Renforçament de l’identitat e vòlha d’independéncia

De son latz, Vilaweb a fach una entrevista d’Aki-Matilda Høegh-Dam que la publica lo jornal en anglés e en catalan e ont l’elegida assegura que se farà un referendum d’independéncia. Dins aquela entrevista, l’elegida conta qu’ara se ven de pèrdre la paur de viure la cultura e d’emplegar la lenga del país, mas que son discors al Parlament demostrava que Danemarc contunha de los “considerar inferiors”. “Amb l’independéncia volèm assegurar que nòstra relacion amb lo Mond se fonda sus l’egalitat”, çò i ditz.

Dins l’entrevista, la jove deputada groenlandesa tanben explica los faches istorics que se venon de conéisser dins la darrièras quatre annadas e que demòstran que Danemarc ensagèt de cometre un genocidi, çò qu’a renforçat mai encara l’identitat dels groenlandeses.

Høeg-Dam es deputada del Siumut, un partit de centresquèrra. Es coneguda per son activisme en favor dels dreches dels mainatges e dels indigènas.