Dissabte passat, qualques minutas abans miègjorn, amb tota la plaça de la Comuna de Pampalona confla de mond en esperant lo txupinazo (fusada que marca lo començament de las fèstas de Sant Fermin), un grop de militants despleguèt una bandièra basca, una ikurrina, qu’èra giganta e que penjava davant la faciada de la comuna, presa per de cables qu’anavan d’un teulat a un autre de la plaça. Mas la comuna volguèt pas començar las fèstas abans que se retirèsse la bandièra, e lo txupinazo se faguèt amb retard, quand lo drapèl i èra pas mai. Lo grop que faguèt l’accion revendicativa a editat un vidèo amb lo making of.
 
Las fèstas de San Fermin comencèron amb d’incidents. A mièg matin, un passacarrièra sortiguèt amb una autre drapèl basco gigant cap a la Plaça de la Comuna, mas un cordon policièr ensagèt de lor empedir l’accès a la plaça e tustèt los que portavan la bandièra. Los manifestants cridavan “Los presonièrs bascos al Bascoat” e “Independéncia”. I aguèt de tensions, coma se vei dins aqueste vidèo; la polícia batèt qualques personas, e demest los ferits i a Txelui Moreno, lo pòrtavotz de l’esquèrra abertzale (patriotica), que recebèt de còps fòrts mentre qu’ensajava de parlar amb los policièrs. Fin finala, capitèron d’intrar dins la plaça.