La manifestacion Promaude, fèsta dels terradors audencs, sostitolada “Festenal Aude al País”, aculhirà un punt “Vilatge occitan” a Lesinhan de las Corbièras (Estadi Gaujac) per Pentacosta (del divendres 26 al diluns 29 de mai).

Al punt d’informacion, prepausat pel CIRDÒC e l’IEO Aude, se poirà veire la mòstra sus 1907 en bendas dessenhadas e, de segur, s’informar sus las activitats occitanas dins l’encontrada. La calandreta Lo Cigal de Bisan de Menerbés i tendrà un estanquet que prepausarà evidentament de produits locals.

La jornada del divendres, d’activitats, estampilhadas Total Festum, seràn prepausadas als escolans. La Liga de Tambornet ofrirà una iniciacion cada jorn d’aquel espòrt que l’escrivan Max Roqueta joguèt un ròtle de primièra dins son espandiment.

Los dançaires traparàn de qué bolegar las cambas e los braces amb Les Dormeurs du bal (lo divendres 26, 20h-22h), Castanha e Vinovèl (lo dissabte, 16h-18h e 20h-22h), Cab’Cabaret (lo dimenge: obrador de 14 a 15h, balèti: 16h-18h e 20h-22h), Folle Cadenc e (lo diluns, obrador de 14h a 15h e balèti: 15h-17h30). Dins las andanas de la manifestacion, poiretz crosar l’Escòla de Bodega lo dissabte e Camille amb son parelh Clan Destino lo diluns. Lo dimenge, a la vista de vòstra cara, riscatz fòrt d’èssser contrarotlats per la POP (Polícia Occitana de Proximitat). Lo diluns, sul còp de miègjorn, lo grop vocal de Cabardés Cossí Que Siague animarà un aperitiu musical. Ràdio Lenga d’Òc Aude realizarà tanben de dirèctes de la manifestacion estant.

Promaude met endavant los productors e artisans locals. Los punts per se noirir e per beure son nombroses; las activitats ofèrtas plan variadas. De repaisses de terradors seràn prepausadas per valorizar cada parçan del departament entre Val Nauta, Montanha Negra e Mar Nòstra. Atal, al menut del dilmenge de ser, consacrat a Menerbés, poiretz manjar: de milafuèlhas de cranc e tapenada; una lauseta sens cap de polalha e sos espargues rostits; una sieta de formatges; un pastisset cerièra-amètla.

L’espèr es de desvolopar los rapòrts e las sinergias entre produccions agricòlas, torisme e cultura occitana e de bonificar los contactes que naisseràn dins aquelas jornadas.