Lo Servici Federal de Proteccion (SFO) de Russia, que s’encarga de la seguretat del país, a decidit de tornar emplegar de maquinas d’escriure per evitar de fugidas a travèrs de mèdias numerics.

Après las revelacions de l’èx-tecnician de la CIA Edward Snowden e de las informacions de Wikileaks, los servicis secrets russes an ja recuperat un vintenat de maquinas d’escriure, segon lo jornal Izvestiia. D’expèrts en seguretat an declarat al jornal qu’aquel procediment, qu’èra ja d’istòria, l’emplegan ara los servicis secrets de divèrses païses e d’autras administracions publicas que trabalhan amb de documents confidencials, dempuèi l’“Afar Snowden”.
 
“Del ponch de vista de la seguretat, tot tipe de telecomunicacion electronica es vulnerable. Amb un ordenador se pòt captar quina informacion que siá”, çò declarèt a Izvestiia lo deputat Nikolai Kovaliov, èx-director del Servici Federal de Seguretat rus, qu’èra abans lo KGB. “Se prioriza lo mejan mai primitiu: la man de l’òme o la maquina d’escriure”, çò apondiá.