Lo partit conservator Nòva Democracia a ganhat las eleccions legislativas d’aqueste dimenge passat en Grècia. La formacion a obtengut mai del 40% dels vòtes e es fòrça près de la majoritat absoluda. Es l’actual partit de govèrn e s’es impausat dins totas las regions, franc de Rodòpe, dins lo nòrd-èst del país. Amb aqueles resultats sembla que li caldrà pas cercar de paches per se manténer al poder, e l’actual primièr ministre, Kiriakos Mitsotakis, poiriá servar sa carga. Ara, totun, deu convéncer qualque autra formacion o ben anar a de nòvas eleccions d’aicí a qualques meses. La participacion a despassat lo 60%.

Lo parlament de Grècia aurà cinc partits, amb Syriza coma principala fòrça de l’esquèrra, e mai passe d’86 deputats a 71 amb un pauc mai del 20% dels vòtes. Los seguisson los socialdemocratas del Movement Socialista Panellenic (PASOK), que doblan lor representacion de 22 a 41 deputats amb un pauc mai de l’11% dels vòtes, lo Partit Comunista amb 26 deputats e environ lo 7% dels vòtes e la drecha eurosceptica de Solucion Grèga, qu’obten 16 deputats e aperaquí lo 4,5% dels vòtes.

Syriza assegura que Nòva Democracia auriá ensajat de manipular las eleccions. “La maquinariá de propaganda de Nòva Democracia fa circular «d’instruccions» per obténer de vòtes nuls de Syriza-PS dins lo sector nòrd d’Atenas”, çò denonciava sus Twitter la portavotz de la coalicion d’esquèrra, Popi Tsapanidou. “An quitament mandat d’sms falses”. A mai, a anonciat que Syriza presentariá una denóncia e un recors al ministèri public per temptativa de manipòla de las eleccions.