Lo fondador dels Oath Keepers (Gardians del Jurament), una de las milícias d’extrèma drecha implicadas amb los rambalhs pendent l’assaut del Capitòli dels Estats Units, Stewart Rhodes, es estat condemnat a 18 ans de preson per un delicte de conspiracion sediciosa, çò es la senténcia mai longa impausada per aqueles faches del 6 de genièr de 2021.

“Representatz una menaça constanta e un perilh per aqueste país e per la democracia”, çò diguèt lo jutge Amit Mehta abans de legir la senténcia contra el e contra un autre de sos complices, Kelly Meggs.

“Çò que se pòt pas admetre de cap de biais es qu'un grop de ciutadans fomenten la revolucion perque lor agradèt pas lo resultat d’eleccions”, çò assegurèt lo jutge que remarquèt que dempuèi aquel moment los Estats Units “tenon l’alen” quand arriban d’eleccions.

Lo jutge Mehta soslinhèt qu'aquelas accions èran equivalentas a de terrorisme e que la carga de conspiracion sediciosa “es un dels delictes pus grèus que pòsca cometre un estatsunidenc”.

Lo cas de Rhodes es estada la primièra acusacion importanta que tomba sus un membre d’aquelas milícias. Tanben de membres dels Proud Boys (Fièrs Gojats), dont lor cap Enrique Tarrio, son estats jutjats e declarats colpables de conspiracion sediciosa, mas lor senténcia es pas encara publica.