Serada elèctro, serada trad, serada occitana? L’IEO 31 vos prepausa los 3 en 1: una serada electrotradoccitana e tot aquò dins un encastre excepcional: l’antic sit arqueologic de las Arenas Romanas de Tolosa.

Après la capitada del Fest’Arenas al mes d’octòbre de 2022, consacrat als instruments tradicionals occitans (bodegas, crabas, autbòis), amb de passacarrièras e la magica Vespa Cogourdon Orchestra, l’IEO 31 tornarà investir aquel luòc unic e particular lo 1r de julhet de 2023. Novèl eveniment, novèla tematica: electrotrad. Mas qu’es aquò, electrotrad? Es a l’encòp la volontat de jogar sus d’estils, traire sas fonts dins las musicas dichas tradicionalas d’aicí e d’ailà, en las tornant inventar, las confrontant, per se fondre dins de ressons electronics modèrnes.

Per començar, l’istorian Jòrdi Labouysse nos prepausarà una vesita-conferéncia «Tolosa antica, Tolosa de uèi» tre 17h30, l’escasença de descobrir l’istòria d’aquel sit especial de la Vila Ròsa. Construsit a l’entorn del mitan del sègle Ir, l’anfiteatre roman de Purpan es un dels sols monuments antics de Tolosa encara visibles dins sa globalitat. Puèi, tres grops complementaris per tres concèrts de las sonoritats tradicionalas e electronicas: Platane, MAQX, e Super Parquet. Tre 19h, Platane, rescontre inspirat entre cants polifonics, percussions e musicas electronicas, vos convida a la transida en francés, occitan o breton. Assumissent divèrsas influéncias, Platane fa partida d’aquela generacion nòva e apassionanta qu’emana de las musicas dichas tradicionalas. En seguida, MAQX: dos musicians, multiinstrumentalistas de talent, qu’espandisson un mescladís inesperat de tròbas electronicas e d’instruments tradicionals o fargats a l’ostal. Un groove que calinha amb generositat la farandòla tan coma lo dancefloor pòstindustrial. E per acabar, la musica psiquedelica d’Auvèrnhe de Super Parquet ressonarà dins l’anfiteatre roman. Tròba sas originas dins un truc de culturas: enfants del balèti popular e de las musicas tradicionalas, tan coma del petaçatge electronic e del bombom telluric dels dancefloors. Aquela tension fertila produsís un dialòg musical infinit e innovant, e o autoriza tot: la jòia, la dansa, la susor, la transida, los tèrratremols e la fèsta mai que mai.

L’eveniment, labellizat Total Festum, es realizat en partenariat amb lo Musèu Sant Raimond, amb lo sosten tecnic de l’Estancabra. L’intrada es liura, e un estanquet e mai un punt de restauracion seràn a disposicion.

L’Institut d’Estudis Occitans, seccion de Nauta-Garona (IEO 31) es una associacion que ten per tòca la promocion e la difusion de las cultura e lenga occitanas, a Tolosa e dins lo quite departament de Nauta-Garona. L’IEO 31 organiza entre d’autras activitats lo Festenal Occitània aital coma d’eveniments culturals tot long de l’annada. Prepausa tanben de corses d’occitan per adultes de tot nivèl e gerís la librariá occitana La Tuta d’Òc.