L’artista contemporanèu Jean-Charles Couderc intervenguèt en febrièr passat a l’escòla de la Calandreta Dagdenca. Prepausèt de talhièrs artistics als pichòts de mairala e als elementaris dins l’encastre del projècte d’escòla “Agde, vila de bona fortuna”.

Aqueste projècte aguèt per tòca de permetre als escolans de s’apoderar lor patrimòni cultural, de descobrir l’istòria de sas carrièras singularas e de metre en valor d’un biais artistic lo centre vila istoric d’Agde.

Una mòstra d’òbras realizadas pels calandrons serà prepausada a la MAG, la mediatèca dagdenca, del 3 al 23 de junh venent.

Vint òbras occitanas reprodusidas sus de telas bèlas seràn expausadas dins lo pargue Picheire, al costat de l’Ostal Consular, l’ostal del còr de vila.

Aquestas òbras seràn tanben disponiblas dins lo centre istoric de la vila vièlha, sus de placas, situadas a cada endrech remarcable que los escolans e la còla pedagogica desirèron valorizar. Un còde QR marcat sus cada placa permetrà als passejaires de descobrir o de tornar remirar, d’un biais liure e a son biais, çò que s’amaga darrièr cada luòc.

Convidam los curioses e los caminaires, aqueste dissabte 3 de junh, a 15h00, a partir de l’Ofici del Torisme d’Agde, a seguir un desenat d’estapas dins la vila vièlha. Oficializarem, amb l’ajuda del guidaire conferencièr Arnaud Sanguy, lo percors Baludik que serà mes en linha en aquesta escasença.

Aquèste projècte s’adreiça a un public escolar, als dagdencs e dagdencas e als toristas qu’auràn accès als contenguts del percors pensat a travèrs de la vila, abans, pendent e après l’estiu. Es prepausat en bilingüe occitan-francés. Un mejan d’ausir e de far petar la lenga, un biais de metre a l’onor lo nòstre parlar regional.

Vos convidam nombroses per una estrena que marcarà la concretizacion d’aqueste projècte d’escòla qu’es a l’encòp educatiu, cultural, patrimonial e subretot federador. Lo moment per l’associacion de la Calandreta Dagdenca de mercejar d’un biais official totes los partenaris financièrs e tecnics e subretot los nòstres pichòts artistas occitans.

Una inauguracion gaujosa es prevista dissabte que ven, lo 3 de junh, a 18h00, en musica e amb l’artista pintre Jean-Charles Couderc, en presencial, a la mediatèca dagdenca.

Jornalet a l'escòla

Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a.

 Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans.

Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jor…