Damb Mónegue, qu’ei un estat sobeiran, Aran ei eth solet territòri d’Occitània qu’a eth sòn autogovèrn. Ager viuec ua dobla jornada electorau. Ath delà des eleccions municipaus, qu’an auut lòc en tot er estat espanhòu, es aranesi an tanben votat peth Conselh Generau, era mès nauta institucion de govèrn deth país que siguec restaurat en 1990 dempús de 156 ans d’inactivitat, e refortit dempús de 2015 damb era naua Lei d’Aran.

Era socialista Maria Vergés serà elegida sindica d’Aran dempús de guanhar es eleccions ath Conselh Generau d’Aran laguens ua jornada electorau damb ua participacion deth 63,87%.

Convergéncia Democratica Aranesa - Partit Nacionalista Aranés (CDA) a melhorat damb mès de 5 punts es resultats des darrièri comicis e a obtengut un 34,99% des vòts en tot obtier 4 des 13 conselhèrs generaus, deth temps qu’Unitat d’Aran (UA), aliada deth Partit Socialista (PSÒE), a obtengut eth 49,05% des vòts e a emportat 9 conselhèrs. Damb eth 10,71% des vòts era lista esquerrista d’Aran Amassa non a obtengut cap de conselhèr generau.

Alidé Sans elegida bailessa de Bausen

Era cantadora aranesa, Alidé Sans, plan coneishuda per occitanisme, a estat elegida còsso màger de Bausen damb majoritat aboluda, per tant, cap d’aqueth conselh municipau, damb Aran Amassa.

UA empòrte eth conselh municipau de Vielha damb un còsso mens que hè quate ans. Es socialistes an tanben guanhat es ajuntaments de Bossòst, Canejan, Es Bòrdes e Les. CDA guanhe es ajuntaments de Naut Aran e d’Arres. Aran Amassa a obtengut er ajuntament de Bausen e representacion enes ajuntaments de Les, Vielha e Naut Aran.

Aran, en canvi: qui és Alidé Sans, la nova alcaldessa de Bausen, el poble que trenca els esquemes del turisme? 👇🏻🧵 [FIL] https://t.co/r3TpbIx9A4

— País Invisible Podcast (@paisinvisible) May 29, 2023