Aqueste dimenge, sus la pelena de l’estadi de Narbona, una esquipa se metèt en evidéncia per atudar las esperanças de l’adversari: lo sòmi de doblat Copa-campionat de Carcassona s’esvaniguèt.

Los Canaris dominèron d’un biais estèrle las primièras dètz minutas. Los Roge e Negre metèron a profièit o forcèron las escasenças que se presentèron a eles per puntar 3 ensages e menar 14-0. Just abans la pausa, un ensag de Boregba balhava un pauc d’espèr als carcassoneses.

Mas tre la represa, una recepcion de palma mancada entraïnava un novèl ensag limosenc. Los Canaris avián perdut lor rugbí e multipliquèron aproximacions e causidas aleatòrias. Lo tot es que se trapèron menats 6-34. Se capitèron de marcar tres ensages transformats dins las darrièras 5 minutas per pèrdre en definitiva 24-34, èra tròp tard per concretizar l’objectiu del doblat. Dimenge de ser, la fèsta foguèt mai gaujosa jos las arcadas de la plaça de la Republica que jol mercat cobèrt de Carcassona.

Los autres campions d’aquesta dimenjada narbonesa de la prima del XIII son:

• en U19, lo XIII Catalan-Sant-Estève bat Vilanòva: 32-12
• en U17, partida plan disputada: lo bloquièr per Baó que bat lo XIII Catalan 22-22 e 4 tirs al but a 3!
• en U-15, victòria de l’Acadèmia Esportiva carcassonesa fàcia als albigeses: 24-18
• en Elèit 1 femenin, lo bloquièr es per las Divessas Catalanas que baton l’Escura 22-14
• en Elèit 2 femenin, victòria de Pià sus Aigas-Vivas: 50-16
• en division nacionala femenina, victòria del Mas d’Agenés sus Clairac al nombre d’ensages (egalitat a 22 pertot)
• en femeninas U15-U17, lo bloquièr pren la direccion de Lesinhan que bat Pià: 16-12
• en XIII-cadieral, victòria en Elèit 1 dels Dragons Catalans (56-33 fàcia a Montalban) e en Elèit 2 de Biganòs (50-16 fàcia a Tolon).

Superliga: Catalans-Wigan per la Dimenjada Magica

Divendres de ser, los Dragons Catalans s’impausèron 36-6 fàcia a la lantèrna roja Wakefield. Wigan ganha cò d’Hull KR 26-22 e St Helens va ganhar a Leeds 13-12. Leigh se paga lo primadièr Warrington 30-12. Huddersfield bat Castleford 20-4 e Salford bat Hull FC 29-22.

Aquesta dimenjada, se jogarà la Dimenjada Magica a Newcastle. Dissabte, l’adversari dels Dragons serà Wigan e, de segur, una victòria seriá plan mai interessanta qu’una desfaita!

Aqueste dissabte, se jogaràn tanben las partidas: Salford-Hull KR, Leeds-Castleford; puèi dimenge: Wakefield-Leigh, Saint Helens-Huddersfield e Hull FC-Warrington.

En Championship, corta desfaita del Tolosa Olimpic fàcia a Londres (14-10) dins una partida que se jogava a York. Aqueste dissabte 3 de junh, los occitans reçaupràn las Pantèras d’Halifax (a 6 oras del vèspre).

Estat d’origina a Adelaïda

Lo primièr Estat d’Origina de la sason entre las seleccions de Queensland e de Nòvas Galas del Sud se jogarà aqueste dimècres 3 de mai; partida deslocalizada a Adelaïda.

La jornada d’NRL se faguèt sens los jogaires retenguts dins las seleccions. Cinc partidas èran al programa. Victòrias al defòra de Brisbane en Nòva-Zelanda 26-22 e de Canberra cò dels Lapinons 33-26. Los Dalfins baton los Dragons 26-12, las Anguialas dominan los Vaquièrs 24-16 e Newcastle bat Manly 28-18.