Indignacion en Itàlia arron las declaracions racistas del vicepresident del Senat. Roberto Calderoli, de la Liga Nòrd, comparèt la ministra de l’Integracion, Cécile Kyenge, amb un orangotan, pr’amor qu’es negra. Calderoni foguèt ministre en un dels govèrns de Berlusconi e es plan conegut per sas opinions xenofòbas e contràrias a l’immigracion.
 
“M’assolaci quand navigui dins Internet e vesi de fotografias del govèrn. Es causa coneguda qu’aimi los animals, los orses e los lops, mas quand vesi los imatges de Kyenge pòdi pas quitar de pensar, e mai se disi pas qu’o siá, a las faccions de l’orangotan”, çò afirmèt Calderoli.
 
Cécile Kyenge, nascuda en la Republica Democratica de Còngo, a levat d’importància a l’afar e diguèt que los afrontaments politics los cal aver sul terren de las idèas e non pas sul dels insultes. Ça que la, Kyenge a recebut un molon de comentaris racistas dempuèi qu’en abril passat fa partida del govèrn d’Enrico Letta.
 
Justament Letta, lo primièr ministre italian, faguèt un comunicat que condemnèt las paraulas de Calderoli en las qualificar d’inacceptablas.