Lo primièr ministre espanhòl, Pedro Sánchez, a anonciat qu'avança las eleccions espanhòlas al 23 de julhet, en seguida de la desbranda del Partit Socialista (PSOE) de las eleccions municipalas e regionalas de dimenge passat. Las eleccions èran previstas per la fin de l’annada. Sánchez assabentèt lo rei, Felip VI, de sa decision e après un conselh dels ministres se publiquèt oficialament l’avançament de la votacion.

Dimenge, lo Partit Popular (PP) foguèt la fòrça mai votada dins tot l’estat, en s’impausant dins un fum de comunas e regions ont governavan los socialistas, dont lo País Valencian e las illas Balearas.

Decepcion independentista en Catalonha

En Aran, se tenián las eleccions municipalas e al Conselh General, mas al Principat de Catalonha èran solament municipalas. Tanplan, los resultats son dignes de reflexion e analisi, vista la granda pojada de l’abstencion e la fòrta desbranda de l’independentisme, especialament d'Esquèrra Republicana de Catalonha (ÈRC), al poder a la Generalitat, qu'a passat de 822 107 vòtes en 2019 a 302 274 en 2023.

Vam independentista en Bascoat

En Bascoat Sud, totun, l’esquèrra independentista d’EH Bildu a capitat un resultat istoric e al total a obtengut mai de vòtes que la primièra fòrça, los autonomistas del Partit Nacionalista Basco (EAJ-PNV).