Lo Principat de Mónegue festeja ongan lo centenari de la naissença de Rainièr III amb una tièra d’eveniments organizats per un comitat que lo presidís la princessa Estefània. Los eveniments comencèron dimècres passat, 31 de mai, jorn que lo dich “Prince Bastidor” auriá celebrat son centen anniversari.

Demest los nombroses eveniments, se tenguèron d’obradors e d’activitats suls subjèctes mai volguts per Rainièr III, s’inaugurèt una exposicion sonada “Lo Prince a l’ostal” e lèu se n’inaugurarà una autra amb la colleccion de fòtos, d’objèctes e de documents estranhs que lo prince servava. Dins aquel sens, la familha reiala se passegèt pel Principat amb la colleccion de veituras ancianas del Prince.

D'autras exposicion son previstas coma lo Jardin de Ròsas de la princessa Gràcia o la del Club Nautic que celebrarà l’amor de Rainièr per la mar o encara los jardins zoologics que li agradavan tant.

De soslinhar d’autres eveniments previstes long d’aquesta annada, dont lo concèrt de la banda de la Gàrdia del Palais a las Nacions Unidas de Nòva York lo 19 de junh, per commemorar lo 30n anniversari de l'adesion de Mónegue a l'ÒNU, lo concors tradicional de lenga monegasca ont participan los escolans del Principat, lo carnaval d'estiu “O Sciaratu” e la gala de la Crotz Roja. Es previst que los eveniments se tengan fins al començament de 2024 après lo mercat de Nadal e lo ralli istoric de Montcarles, a mai del festenal internacional de circ de Montcarles.

E mai, ara per ara, lo francés siá la lenga d’usatge social, lo Principat de Mónegue a doas lengas tradicionalas: d’un caire lo monegasc, una enclava de ligur dempuèi l’Edat Mejana sus la Ròca, ont i a lo palais princièr e lo centre del poder, e d’autre caire l’occitan local dins l’airal de Montcarles, que fa transicion entre lo niçard e lo vivaroalpenc.