Las fòrças de seguretat francesas arrestèron diluns passat los 29 activistas de Greenpeace qu’avián ocupat de matin la centrala nucleara de Tricastin. La tòca de l’accion èra d’atraire l’atencion del president de l’estat, François Hollande, a prepaus del barrament d’aquela centrala.
 
Lo de Tricastin “es un dels cinc sits mai perilhoses de França” segon los militants ecologistas, que despleguèron doas bandieròlas: una amb la fotografia d’Hollande que s’i podiá legir “President de la catastròfa”, e sus l’autra se disiá “Tricastin: accident nuclear”.
 
Pendent la nuèch se projectèt una fendilha sul reactor numèro 1 del sit per remembrar “totas las fendilhas que son estadas descobèrtas dins las installacions” d’aquel sit, segon un pòrtavotz de l’organizacion.
 
Un cinquantenat de gendarmas, un elicoptèr, una brigada de las CRS de nauta montanha e la gendarmariá arrestèron los 29 militants, segon lo Ministèri de l’Interior.