Lo famós festenal literari internacional de roman policièr Empreinte Carbonne (Emprenta Carbona) torna comprene ongan un rescontre literari en occitan e i seràn d’autors en lenga nòstra e la librariá La Tuta d’Òc. Lo cantador carbonés Eric Fraj animarà de cafès literaris dissabte e dimenge que venon, 10 e 11 de junh. Dissabte, vendrà l’escrivan peiregòrd Joan Ganhaire e dimenge l’autor bigordan Joan-Loís Lavit. Los rescontres començan a 16h e se faràn en occitan sens traduccion simultanèa en tota normalitat occitanofòna.

Empreinte Carbonne se tendrà dins lo capluòc de Volvèstre los 10 e 11 de junh e convidarà d’escrivans de pertot dins un programa fòrça ric cargat de rescontres amb los autors dins un encastre festiu e un decòr magnific amb de cafès literaris, de taulas redondas, de cinèma, de teatre, una dictada negra... e, de segur, la remesa oficiala dels prèmis.

Arunan, se tenguèt pel primièr còp un rescontre literari en occitan dins lo qual Eric Fraj conversèt amb Florian Vernet, autor de romans policièrs e fantastics.

Mai d’informacion sus empreintecarbonne.fr.