Los catalans èran ja anats ganhar a Wigan en debuta de sason: 18-12. Tornavan trapar los Combatents dissabte de vèspre sus la pelena de Newcastle per la partida de la Dimenjada Magica. Morgue passèt una penalitat , puèi los angleses marquèron lo primièr ensag. Los Sang e Aur alinhèron quatre ensages abans la pausa: 24-8. Lo festenal contunhèt dins lo segond temps amb 4 novèls ensages que portèron la marca a 46-8. En signant tres ensages, Johnstone ven lo primièr marcaire de la sason amb 17 realizacions. Dins las darrièras minutas, los catalans dessarrèron la defensa e los angleses marquèron 3 ensages per pèrdre 22-46.

Dimenge, Warrington èra batut per Hull FC: 18-30. Çò que fa que son los Dragons que se trapan primadièrs de Superliga!

Dissabte, Salford aviá batut Hull KR: 26-16, Castleford venciá per 26-24 Leeds. Dimenge, Leigh domina Wakefield 30-4 e Saint Helens cartona los Gigants d’Huddersfield: 48-6.

Dissabte, a 7 oras del vèspre, lo public de Brutus espèra una confirmacion bèla fàcia a Hull KR.

En Championship, Tolosa torna trapar lo gost de la victòria: 28-22 fàcia a Halifax.

Doas victòrias per Queensland

Dimècres 31 de mai, a Adelaïda, se dobriguèt la tièra de 2023 dels “StateofOrigine”. En fin de partida, alara que jogavan a 12 contra 13, los Bordèu (Queensland) marquèron dos còps; un ensag en desbòrdament, puèi lo pilar Larey Collins panava una palma sul cap de Tedesco per mandar Cameron Munster a l’ensag. Victòria de Queensland: 26-18.

L’endeman, veniá lo torn de la formacion femenina de Queensland de s’impausar: 18-10.

Las esquipas se tornaràn trapar lo dimècres 21 de junh pels òmes e lo dijòus 22 per las femnas.

En NRL, Penrith primadièr

En campionat NRL, las Pantèras de Penrith tornan trapar lo cap del classament aprèp la victòria fàcia als Dragons: 26-18. Cortas victòrias per Canberra (20-19 cò dels Tigres) e pels Polets (25-24 fàcia als Dògols); per contra, los Lapinons dominan los Titans 46-28 e los Vaquièrs baton Melbourne 45-20.