Actualitats
Un arrèst de 30 000 ans
L’arrèst de 30 000 ans que lo faguèt nòstra espècia en tèrras aràbias l’auriá ajudada a s’adaptar a de nòvas condicions climaticas e aital poguèron subreviure al freg
Sapiéncia Occitana
Nòstra espècia nasquèt fa 300 000 ans en Africa. Puèi conquistèt aquel continent, ont tanben demorava Homoerectus. Puèi se comencèt d’espandir en defòra d’Africa per Asia entre fa 60 000 e 50 000 ans. Pasmens, sembla que quand arribèt dins la peninsula aràbia i demorèt gaireben 30 000 ans abans de tornar anar conquistar d’autres continents.
Es la resulta d’un nòu trabalh scientific publicat dins lo numeric PNAS. Homo sapiens sapiens seriá sortit d’Africa e se seriá arrestat almens 30 000 ans dins la peninsula aràbia abans de contunhar la conquista de la planeta. Pr’amor que los primièrs colonizaires modèrnes serián arribats ailà benlèu fa 100 000 ans e aurián trespassat aquel territòri, fins en Índia, vèrs 70 000 abans l’epòca actuala. E en Euròpa fa 55 000 ans. Puèi seriá vengut la conquista de Siberia (fa 25 000 ans) e d’America ( fa 15 000 ans).
S’adaptar melhor al clima
L’arrèst de 30 000 ans que lo faguèt nòstra espècia en tèrras aràbias l’auriá ajudada a s’adaptar a de nòvas condicions climaticas e aital poguèron subreviure al freg. Son de cambiaments genetics que uèi son restacats amb de malautiás coma l’obesitat, lo diabète o los problèmas cardiovasculars.
L’environament a totjorn cambiat geneticament l’espècia nòstra. Avèm la facultat de nos adaptar a totes los climas vertadièrament estonanta. E que benlèu d’autras espècias umanas aguèron pas. Sonque aital avèm ganhat la planeta e vencut la concurrència ominina. E qualques unes d’aqueles cambiaments genetics arribèron per la mescla amb aquelas autras espècias.
Los cercaires confirman que fa 60 000 ans i aguèt una fasa d’adaptacion estonanta de nòstra espècia. Una fasa que durèt 30 000 ans. Es estat confirmat geneticament e tanben arqueologicament e climaticament. Nòstres ancessors s’arrestèron dins lo nòrd arabi per s’adaptar a un clima pus freg.
Puèi, amb una melhora capacitat de produire mai de gras corporal, mai de nèrvis, una pèl pus resistenta e mai de fibras pichonas dins los òrgans per alenar avèm pogut contunhar lo camin. Pas abans. Lo clima de la peninsula aràbia entre fa 80 000 e 50 000 ans èra plan mai fred que l’actual. (Legissètz la seguida).
Aqueste article es publicat dins Sapiéncia, la revista occitana de divulgacion scientifica, amb la quala Jornalet a un acòrdi de cooperacion. Podètz legir l'article entièr aicí.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
"Nòstra espècia nasquèt fa 300 000 ans en Africa."Formulat aital, dona d'aire a la "creacion d'Adam e Èva". Las vairantas geneticas de caracterizan nòstre grop uman acutal emergiguèron pauc a pauc (e non pas tot d'una, coma tiradas d'un capèl de magician ni d'un fotut demiurgue malvolent que non felicitariái pas, se'n manca e de luènh…) a l'entorn de 300 000 milas abans nosautres. E non "conquistèt" pas res. Avancèt pauc a pauc, en cèrca permanenta de quéviure. Coma los autres grops omninizats abans ela. "Avançar" non es "conquistar", senon dins l'esperit supremacista franco-espanhòl classic…
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari