La destruccion de la restanca de Nòva Kakhovka, en Ucraïna, es en primièra pagina de la majoritat dels mèdias. Aquel fach, considerat coma un crime de guèrra, a provocat una catastròfa sus la region de las bocas del Dnièpre. S’agís de la darrièra restanca de totas las que contraròtlan lo flux del flume, la mai pròcha de la mar. Es un barratge de 3 quilomètres de longor qu'amassava una quantitat d'aiga enòrma sus un lac long de 240 quilomètres. La zòna inondada a afectat aperaquí 42 000 personas que son o seràn lèu evacuadas. La region venguda de tot en tot inondada es la ont los analistas imaginavan que l’armada ucraïnesa desplegariá sa contraofensiva ongan.

La destruccion de la sèrva pòt daissar Crimea sens ges d’aiga potabla e pòt empachar lo foncionament de la centrala nucleara de Zaporizhzhia qu’aurà pas pus d’aiga per refrigerar sos reactors.

Ucraïna acusa Russia d’aver atacat aquela infrastructura, mas lo Kremlin ditz l’invèrs, que son de missils ucraïneses que l’an destrucha. D’especialistas internacionals ne fan diferentas interpretacions, que lo desastre poiriá beneficiar a Zelenski o ben a Putin. Es malaürosament possible que demorem longtemps sens saber qui a fach espetar la restanca, mentre qu’una centena de vilas començan d’èsser negadas jos las aigas e que lo desastre ecologic es de primièr nivèl.