Lo debat sul racisme e la possession d’armas es tornat als Estats Units tre l’absolucion del gardian de seguretat George Zimmerman, acusat d’aver tuat un gojat negre de dètz e sèt ans en lo fusilhant. Dins las darrièras oras, i a agut de protèstas dins tot lo país. Las mai multitudinàrias se son passadas a Nòva York, ont de milièrs de personas se son acampadas a Times Square.
 
Fòrça sectors de la societat estatsunidenca considèran que s’agís d’un verdicte amb motivacions racistas.
 
Las autoritats an paur de l’indignacion sociala qu’a causat la senténcia, perque pòt derivar en rambalhs e susmautas. Per aquò lo president Barack Obama a difondut un comunicat que fa una crida a la calma e a respectar la decision judiciària. Obama ditz tanben que la mòrt de l’estudiant negre foguèt una tragèdia pels Estats Units, e que caldriá trobar de manièras de limitar lo drech constitucional a portar d’armas.
 
La jurada a absolgut Zimmerman perque considèra qu’agiguèt en legitima defensa quand fusilhèt lo jove, que tornava desarmat en cò sieu, en Florida, un estat ont la lei permet de tirar pel sol fach de se sentir menaçat. Lo Departament de la Justícia estatsunidenc pensa de revisar lo cas.