Sièis personas nafradas, dont quatre enfantons d’entre 2 e 3 ans, es lo bilanç de l’ataca amb cotèl que patiguèron ièr de matin dins un pargue de la vila d'Anecí (Arpitània). Los enfantons son dins un estat fòrça grèu e riscan la mòrt.

L’atacaire, arrestat per la polícia pauc après l’agression, sembla d'èsser un crestian d’origina siriana sens domicili fixe qu’aviá viscut dètz ans en Suècia ont obtenguèt l’estatut de refugiat. Lo ministèri public a escartat que s’agisca d’un atemptat terrorista e a dobèrt una enquista per “temptativa d’assassinat d’enfants”.

Los rets socials avián publicat un vidèo de l’ataca filmada per un passejaire amb un telefonet que tresvirèt l’opinion publica. Los mèdias e qualques rets socials n’an retirat, puèi, la publicacion.

La classa politica, mai que mai la drecha e l’extrèma drecha, assajan de recuperar l'eveniment dins lo debat per durcir legislativament las politicas migratòrias. De soslinhar las declaracions de la deputada macronista Aurore Bergé qu’a culpabilizat las oposicions del debat sus la reforma de las retiradas “quand de mainatges son en urgéncia absoluda”.