Aqueste dissabte 10, tot bèl just installats a la primièra plaça de la Superliga, los Dragons recebián a Brutus los Barbarosses d’Hull KR. Dètz mila personas dins l’estadi, amb una colònia de 800 sostens venguts d’Anglatèrra, aprecièron l’afrontament.

Lo primièr quart d’ora foguèt equilibrat. Morgue dobriguèt la marca sus una penalitat; anavan seguir tres ensages catalans. Aprèp l’ensag de la 39a minuta, lo còp de relança anava dirèctament en tòca. Dels 50 mètres, d’un mèstre còp de pè, Adam Keighran portava la marca a 20-0.

Los cartons jaunes (dos dins la partida) demesissián pas la dominacion locala que se concretizava per tres novèls ensages. Lo segonda-linha Witley ne marquèt dos e l’alièr Johnstone i anèt de son 18n de la sason. Hull KR finissiá que ne marcava un (76a minuta) qu’empachava pas lo trionf dels Sang e Aur: 38-4.

Lo segond, Warrington, ganha de justesa fàcia a Huddersfield 30-26. Divendres, Salford èra anat ganhar a Castleford: 34-16. Leigh dominava Hull FC 28-16 e St Helens batiá Wigan: 34-16. Dimenge, Wakefield esperèt la quinzena jornada per ganhar enfin una partida: victòria 24 -14 fàcia a Leeds.

Aquesta dimenjada, plaça als quarts de la Cup. Dissabte, los doas esquipas d’Hull reçaupràn: Salford pels KR e Saint Helens per FC. Dimenge, un brave Wigan-Warrington alara que lo darrièr representant del Championship, York, reçauprà Leigh.

Championship: lo TO fa plegar Featherstone

Aquò semblava “mission impossibla”: anar batre lo primadièr Featherstone, sonque de victòrias dempuèi la debuta de la competicion (13 sus 13).

E ben, lo Tolosa Olimpic o faguèt dissabte passat e de plan bèla manièra: 36-18 en signant tres ensages dins lo darrièr quart d’ora.

Dissabte, dins lor estadi d’Ernèst Wallon, los occitans ensajaràn de persègre dins aquela dinamica fàcia a Sheffield.

NRL: Pantèras e Cavals-Fòls tiran la competicion

En Austràlia, Canberra desirava de festejar la 300a partida de Jarrod Croker jol malhòt de la formacion: los neozelandeses èran pas d’aquel avís e ganhan: 36-14. De bravas diferéncias tanben entre Manly e los Dalfins: 58-18, e Melbourne e las Làmias: 54-10. Los Dragons baton los Lapinons: 36-30. Dins las darrièras minutas, los Cavals-Fòls baton Newcastle 24-20. L’autre cap de fila, Penrith, va ganhar cò dels Polets: 30-6!

Una novèla jornada s’anóncia amb d’esquipas que deuràn comptar amb l’abséncia dels seleccionats per la segonda confrontacion del State of Origine (dimècres 21 de junh).