Segon una enquèsta publicada ièr, aquela formacion, qu’es contra las reduccions budgetàrias prepausadas per l'Union Europèa, obtendriá 23,8% dels vòtes (n'obtenguèt 16,7% dimenge), e Nòva Democràcia, que ganhèron dimenge, passarián a la segonda posicion. 

 

Lo sondatge balha 17,4% dels vòtes a Nòva Democracia (en luòc dels 19% de dimenge) e 12,6% als socialistas del PASOK (13% dimenge). 

 

La fragmentacion del parlament resultant de las eleccions de dimenge empedís de conclure cap d'acòrdi de govèrn. Los dos partits tradicionals de la politica grèga, los conservadors de Nòva Democracia e los socialistas del PASOK, son a un deputat de la majoritat parlamentària e cap dels autres sèt partits los vòl pas sosténer.

 

Lo PASOK es ara l'encargat de cercar l'acòrdi amb las autras formacions. La soleta possibilitat de l'aténher es que l'Esquèrra Democratica, que tanben es contra las condicions impausadas per l'Union Europèa pel salvament financièr, li balhèsse lo sieu sosten puntual per evitar de nòvas eleccions; sens besonh d'engatjar mai d'un dels sieus dètz-e-nòu deputats, ni tanpauc de far partida del govèrn. Segon los sieus dirigents, o farián "per responsabilitat", mas en vertat es qu'an paur que d’eleccions nòvas pòrten un transferiment del vòte a Syriza, formacion que marquèt l'estonament electoral dimenge passat.

 

Giannis Bournous, pòrtavotz de Syriza, diguèt dijòus passat al jornal catalan ARA que "Grècia deu contunhar dins de l'èuro e cal renegociar lo salvament". Bournous apond que Syriza formaràn pas un govèrn impossible e aspiran a ganhar las eleccions se las cal repetir. "Cresèm en Euròpa, mas pas a un modèl neoliberal per la bastir". Lo pòrtaparaula de l'esquèrra grèga es segur que "caldrà repetir las eleccions: esperam qu'alavetz l'unitat d'esquèrra siá possibla".