L’èx-primièr ministre d’Itàlia Silvio Berlusconi moriguèt ièr diluns, 12 de junh, a 86 ans. Divendres, a l’espital San Raffaele de Milan, s’èra somés a una revision medicala e ne sortiguèt pas. Fasiá mens d’un mes qu’i aviá passat 44 jorns per una infeccion pulmonara derivada d’una leucemia cronica que patissiá. De fach, la santat del Cavaliere aviá empejorat aquestes darrièrs meses.

Fondador del partit drechista Forza Italia e d’un empèri televisiu, Berlusconi es estat un personatge plan controversiat qu’a marcat pendent mai de trenta ans la politica italiana e l’imaginari de la television. Es estat loprotagonista d’escàndols mediatizats, coma las fèstas sexualas qu’organizava dins sos ostalasses, e es estat mai d’un còp enseguit en justícia per corrupcion. Mas dels 35 afars sonque un menèt a una senténcia definitiva. Ça que la, èra totjorn un personatge popular.

Foguèt primièr ministre d’Itàlia los ans 1994-1995, 2001-2006 e 2008-2011. En 2011, foguèt condemnat per frauda fiscala e declarat inelegible. Totun, capitèt ben a tornar a la politica en 2022 coma senator, gràcias a l’aliança de son partit amb lo govèrn d’extrèma drecha de Giorgia Meloni. Foguèt tanben deputat del Parlament Europèu, president del Conselh Europèu e mai d’un còp ministre

Escaissat Il Cavaliere, Silvio Berlusconi nasquèt a Milan en setembre de 1936. Foguèt un famós òme d’afars dels pus rics d’Itàlia. A 25 ans fondèt sa primièra societat de construccion, Cantieri Riuniti Milanese. Un decenni pus tard, creèt la cadena de television Canale 5 e venguèt accionari del quotidian Il Giornale. A 42 ans, fondèt la societat d’investiments Fininvest qu’es venguda un empèri que compren la societat deproduccion cinematografica Medusa, lo grop audiovisual Mediaset e l’ostal d’edicion Mondadori.

Afogat del fotbòl, en 1986 crompèt l’esquipa AC Milan e ne foguèt proprietari fins en 2017. Ara n’èra lo president onorific. Tanben aviá crompat lo Monza, una esquipa modèsta que la faguèt pojar fins a la seria A, la classificacion pus importanta de la liga italiana de fotbòl.

En 2018, lo realizaire Paolo Sorrentine presentèt un biopic de Berlusconi. Entitolat Loro (Eles), se presentèt en doas parts en italian e dins un solet film en catalan, francés e espanhòl titolat respectivament Silvio i els altres, Silvio et les autres e Silvio y los otros.