Lo president de Colómbia, Gustavo Petro, confirmèt dissabte passat sus Twitter que l’armada aviá retrobat vius tres mainatges e un enfanton desapareguts dins la selva d’Amazonia lo 1r de mai après un accident d’avion. L’aparelh s’èra escrachat e avián trobats los còrses del pilòt e de la maire dels enfants mas los petits èran partits. An subreviscut tot sols 40 jorns dins la selva.

Après que los petits foguèron considerats desapareguts, se realizèt la dicha operacion Esperança, compausada de 200 militars de patrolhas de pòbles originaris que coneisson plan ben lo terren.

Los protagonistas d’aquel miracle son Lesly Mukutuy, de 13 ans; Soleiny Mukutuy, de 9 ans; Tien S. Ronoque Mukutuy, de 4 ans, e l’enfanton d’un an Cristin Neruman Ranoque. Son totes fraires e sòrres.

Los trobèron desnoirits e desidratats, plens de fissadas de mosquits. Capitèron a subreviure en bastissent de refugis e en manjant de frucha. A mai, recuperèron qualques paquets de menjar que l’armada aviá lançat d’elicoptèrs estant. La recèrca s’arrestèt pas pr’amor que los socorses avián trobats d’indicis coma de panèls de l’enfanton, de tetinas del biberon, de frucha mossegada e de peadas. A mai, la familha a confirmat que los enfants coneissián fòrt plan l’entorn, mai que mai Lesly.

¡Una alegría para todo el país! Aparecieron con vida los 4 niños que estaban perdidos hace 40 días en la selva colombiana. pic.twitter.com/cvADdLbCpm

— Gustavo Petro (@petrogustavo) June 9, 2023