Lo 6 de junh, aguèt luòc lo rescontre occitan sul fieral de Mende (Marjarida). Aquela jornada recampèt totas las escòlas e qualques collègis del departament de Losèra que participavan al PPA (Projecte Pedagogic Academic) en occitan.

Los escolans poguèrem participar a mai d’un obrador de cants, danças, contes, teatre o encara a un espectacle sus LasAventuras de Gran de Milh, libronet estudiat pendent l’annada escolara. Los collegians de 6a e 5a del collègi Henri Bourrillon faguèrem lo desplaçament a pè fins a l’espaci G. Frêche per i assistir.

Comencèrem per un concert amb lo grop Humpty Dumpty que metèt l’ambient tre la debuta amb de galejadas e una mesa en situacion musicala, coregrafica e vocala. Gràcias a eles, nos familiarizèrem a diferentas cançons e aires coneguts… Après un picnic jol solelh sus la placeta Émile Joly de Mende, jonguèrem un contaire que nos contèt qualques istòrias de Fadas, e la session s’acabèt amb la Dança dels Fadats. Puèi totes dintrèrem dins lo teatre per veire la pèça originala fargada a partir de Las Aventuras de Gran de Milh. Enfin, aprèp aver pres lo gostar ofèrt per la comuna de Mende, totes participèrem a una farandola giganta que recampèt pichòts e grands sul fieral a l’entorn dels personatges del libronet.

Cadun se’n tornèt a son escòla o collègi amb de cançons e d’istòrias dins lo cap que segur sèm pas prèp de doblidar: una crana jornada que passèrem totes ensems!

Ne profecham per mercejar las CPD de l’acadèmia de Montpelhièr que son a l’origina d’aqueles rescontres que se tenguèron dins cada departament la setmana del 5 de junh.

Article redigit pels collegians de 5a del collègi Henri Bourrillon de Mende

Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a.

Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans.

Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jor…