Se tenguèron a Barcelona, diluns e dimars 12 e 13 de junh, los MedCat Days, çò es un rescontre internacional d’agents e institucions de la Mediterranèa, ont l’Euroregion Pirenèus-Mediterranèa aguèt un ròtle especial per son engatjament per la reduccion dels efièches del cambiament climatic e, en particular, per la lucha contra la secada.

Segon lo secretari general de l’Euroregion, Xavier Bernard-Sans, “la Mediterranèa es lo territòri que patís mai d’impacte pel cambiament climatic, per las secadas, per las inondacions, e nos cal far lèu agir ensems totes los govèrns”.

Bernard-Sans expliquèt lo projècte Life Wat’Savereuse qu’a per tòca de reduire lo consum e de reütilizar l’aiga dins lo domeni del torisme, gràcias “a la conscientizacion, tant dels professionals coma dels toristas”. E apondèt qu’es lo projècte que lo fa ja l’Euroregion, “que fonciona ja e qu'Euròpa avalora plan”.

Anoncièt tanbe que se tractava de far la meteissa causa amb l’agricultura, per mejan d’un projècte innovant de conscientizacion dels professionals del sector agroalimentari sus la reütilizacion e l’estalvi de l’aiga. “Un projècte que compta sus l'innovacion qu’aduiràn las entrepresas catalanas, balearas e occitanas. Esperam lèu una responsa fòrça positiva de l'Union Europèa, per far del projècte una realitat”.

Amb l'intervencion de la conselhièra (ministra regionala) d’accion exteriora de la Generalitat de Catalonha, Meritxell Serret, la primièra jornada dels jorns MedCat comprenguèt una taula redonda consagrada a la crisi de la secada, moderada per Xavier Bernard-Sans. I participèron de representants dels tres govèrns qu’intègran l’Euroregion: Mar León, gerenta de l’Agéncia Catalana de l’Aiga (ACA); Stéphane Nguyen, director encargat d’Euròpa e de l’accion internacionala de la region Occitània; e Joana Maria Garau Muntaner, directora generala encargada de las ressorcas idricas dins lo govèrn balear.