Encara un guierdon pel videopodcastPaís Invisible. Aqueste còp, la còla a obtengut lo Prèmi de la Comunicacion Locala 2023 dins la categoria de melhor contengut àudio; la jurada a considerat que s’agís d’un podcast “modèrne e creatiu”per donar visibilitat a la cultura occitana. D’autres laureats dins d’autras categorias son estats de mèdias de prestigi e experimentats coma Betevé, TV Mataró, Ràdio Igualada o Pallars Digital.

Los Prèmis de la Comunicacion Locala los autreja lo ret audiovisual local de Catalonha (XAL, segon sa sigla en catalan) per tal de reconéisser lo panorama comunicatiu local. Ongan se son tenguts dins una gala en seguida de la 24a edicion del Mercat de l’Audiovisual de Catalonha que se debanava a Granollers dimècres passat.

País Invisible es un videopodcast que cèrca de far conéisser Occitània al public catalan. Produch per l’Associacion per la Difusion d’Occitània en Catalonha, que mena a bon tèrme Jornalet, País Invisible es dirigit e presentat per Zep Armentano amb la collaboracion de Ferriol Macip e David Valls.

Lo videopodcast prepausa un viatge sonòr de la Val d’Aran fins a las Valadas en parlant de la cultura, de la musica e de l’istòria de cada encontrada e en presentant los diferents accents de l’occitan e las tradicions de la societat occitana, de Bordèu a la Gàrdia en passant per Mónegue. Lo podcast aprofiècha totes los enregistraments faches pels autres mèdias de l’associacion, coma Jornalet o las emissions sus la cadena de television barcelonesa Betevé.

Après una primièra sason reüssida, la còla es a aprestar una segonda temporada que s’emetrà a partir de la rintrada de las vacanças d’estiu. Podètz veire o escotar los episòdis de la primièra sason sus aqueste ligam. Tanben los trobaretz sus YouTube, Ivoox e Spotify.

🏆#premiscomlocal2023
Ja tenim els guanyadors dels #PCL23
👉Continguts Audiovisuals
📍#MillorContingutÀudio:
✅Paı́s Invisible- Associació Per la Difusió d’Occitània@laxarxa@diba@audiovisualMAC@granollers@rocaumbertfapic.twitter.com/2uLXwQVXPl

— premiscomunicaciolocal (@premiscomlocal) June 14, 2023