Mètges Sens Frontièras (MSF) crei pas la version gardacòstas de Grècia segon la quala lo naviri que naufraguèt lo 14 de junh passat davant las còstas de Grècia auriá refusat d’èsser ajudat. Lo coordinator de salvaments d’MSF, Juan Matías Gil, diguèt a Catalonha Ràdio que la version oficiala “es pauc credibla” e que l’intervencion dels gardacòstas “se deviá produire fòrça abans”, car “lo nombre de personas que portavan pas cap de flotador èra naut” e i aviá pas degun sul vaissèl capable de lo pilotar. “S’après un accident per carrièras una persona sagnosa ditz quand arriba l’ambulància qu’a pas de besonh d’assisténcia, que farà l’ambulància? Tornarà a l’espital tot tranquillament o l'assistirà pr’aquò?”, çò apondèt. De soslinhar que lo naufragi es considerat una de las piègers tragèdias de l’istòria en Mediterranèa.

En mai d’aquò, Matías Gil afortiguèt que las barrièras legalas que las impausan los estats europèus empenhon las personas que fugisson de realitats insuportablas a decidir de riscar lor vida, e assegurèt qu’aquelas barrièras fan lo lièch de las màfias de trafec de personas. “S’aquelas personas aguèsson una alternativa, los trafegaires aurián pas cap de trabalh e deuriam pas plànher lo nombre de mòrts que son fruch d’aquelas politicas”.