Aqueste dimècres 21 de junh, se tendrà a Brisbane lo segond rescontre de l’State of Origine. Queensland ganhèt la primièra partida e ensajarà de confirmar sus sas tèrras per ganhar tre ara la tièra de 2023. Los entraïnaires an degut faire apèl a qualques jogaires novèls en rason de las nafraduras . Cò dels Blaus, Mitchell Moses jogarà a la mesclanha per remplaçar Nathan Cleary alara que Latrell Mitchell, nafrat al pompilh, demorarà tornar sus la tòca.

Cò de las femnas, ont se jògan pel primièr còp doas partidas, Queensland ensajarà tanben de confirmar sa primièra victòria dijòus sul terren dels Vaquièrs.

Los Leopards a Brutus

Aqueste dissabte 24, los Dragons reçaupràn los Leopards de Leigh a Brutus. Objectiu: ganhar e servar la primièra plaça al classament. Coma la partida se jòga lo jorn de Sant Joan, lo rescontre serà plaçat jol signe de la catalanitat.

Durant qualques annadas, lo club aviá l’infirmariá comola. Ongan, es pas lo cas. Alara, prèstan de jogaires a d’autras formacions per que demòren en fòrma, en mai de l’acòrdi amb Tolosa. Vaquí que Tanguy Zenon a marcat un ensag per Hull KR en Cup e es jonh per una quinzenada per Fouad Yaha.

Quatre per la Cup

En quarts de Cup, dissabte, Hull KR elimina Salford 28-10 alara que sus sa pelena Hull FC subís la lei de Saint Helens: 32-18. Dimenge, Wigan elimina Warrington: 14-12. Lo darrièr pensionari del Championship, York, mena a la pausa mas es despassat dins lo segond temps per Leigh: 14-34.

Tolosa en forma

En Championship, Tolosa bat largament las Aglas de Sheffield 48-10 e visa la segonda plaça al classament. Aqueste dissabte, serà Bradford que vendrà rendre vesita als occitans.

Un ensag en aur

Pr’amor de l’State of Origine, solament 5 partidas èran al programa del campionat NRL. Divendres, los Vaquièrs recebián los primadièrs, Penrith. A doas minutas de la fin, prenián l’avantatge 23-22. Dins la darrièra minuta, Penrith egalizava. Ne caliá passar pel punt en aur. S’ensagèt de tombats, mas es al cap de uèit minutas que l’arrièr dels Vaquièrs Drinkwater escapèt a la desfensa advèrsa per puntar l’ensag de la victòria: 27-23.

Dissabte, los Polets van batre Newcastle 18-16 mentre que las victòrias tenon mai d’ample per las Anguialas fàcia a Manly: 34-4, e per Melbourne cò dels Tigres: 28-6. Dimenge, las Làmias estrelhan los Dògols: 48-10.