Lo senat d’Austràlia aprovèt diluns d’organizar un referendum constitucional istoric suls dreches dels pòbles indigènas per qu’aquestes aguèsson un representant que foguèsse lor pòrtavotz al parlament.

La legislacion s’aprovèt per 59 vòtes en favor e 19 contra, e permetrà al primièr ministre, Anthony Albanese, d’establir la data del vòte, que comprendriá una revision de la Constitucion australiana.

Lo govèrn considèra qu’aital Austràlia a l’escasença de compensar de sègles d’injustícia contra los pòbles aborigèns en lor donant enfin una votz per tal de prene de decisions dins lo parlament. La ministra dels afars indigènas, Linda Burney, diguèt que seriá un moment decisiu pel país e manifestèt son emocion.

La reforma significariá que los aborigèns australians foguèsson reconeguts pel primièr còp dins la Constitucion. A mai, aurián drech d’èsser consultats pel govèrn pee de decisions e de projèctes de lei que poguèsson pertocar lors comunautats.

“S’agís de nòstra identitat coma nacion”, çò assegurèt Albanese, en tot saludar la decision. “Uèi, nòstre Senat a dich de òc a l’organizacion d’aquel referendum. Ara lo pòble australian aurà l’oportunitat de dire de òc a la reconciliacion”, çò diguèt.

Los deputats conservators son pas d’acòrdi e an plangut lo risc, segon eles, d’agreujar la division raciala del país en tot preveire que la reforma auriá “un efièch orwellian que menariá al fach que cèrts australians serián mai egals que los autres”, çò declarèt lo cap de l’oposicion, Peter Dutton.

Legislation enabling a vote on the Indigenous Voice to parliament is tonight through the Senate, with the decision now left to the Australian people. @ccroucher9#9Newspic.twitter.com/6NpzYN9pCd

— 9News Australia (@9NewsAUS) June 19, 2023