La formacion auvernhata Sourdurent presentèt en mai passat son darrièr album entitolat Èrba de Destorba, que definisson coma “un trebalh d’orfebrariá sonòra, una òbra poetica barròca e ’na crida per la fèsta”. L’album captura l'energia d'un concèrt en dirècte e met endavant l'armonia vocala, los instruments tradicionals e los elements electronics. Lo grop posa son inspiracion dins lo fòlc tradicional d'Auvèrnhe cantat en occitan. Las paraulas engatjadas d'Ernest Bergès abòrdan de subjèctes tals coma lo patriarcat, l'autonomia e la necessitat de tornar bastir nòstras comunautats.

L’album es tot cantat en occitan, mas pasmens la banda crei que lor musica pòt transcendir las barrièras lingüisticas e desira de guidar los auditors non occitanofòns curioses cap a la musica tradicionala en lenga nòstra. Èrba de Destorba es considerat coma un enregistrament folcloric màger de l'èra modèrna, que combina de sonoritats tradicionalas e experimentalas.

Sourdurent es lo novèl projècte musical d'Ernest Bergès, experimentalista fòlc auvernhat. Après d'annadas coma artista sòlo, Bergès a transformat “Sourdure” en una formacion a quatre membres, rebatejada “Sourdurent”.

Sourdurent. L’Herbe de Détourne/L’Èrba de Destorba. Murailles Music & Bongo Joe, 2023. 12 cançons. Descarga numerica 7 èuros, CD 12 èuros, vinil 20 èuros.