Los mèdias ne parlan fòrça. Una operacion de recèrca de portada internacionala s’es activada aquesta setmana per salvar lo Titan, lo vaissèl sosmarin desaparegut al fons de l’ocean Atlantic mentre qu’explorava las rèstas del Titanic. Dedins se tròba lo pilòt e quatre passatgièrs qu’an pagats 250 000 dolars per l’aventura. L’operator Ocean Gate comercializa lo viatge coma una autentica mission scientifica e non pas coma un viatge de plaser.

Una d’aquelas personas es Hamish Harding, entrepreneire, pilòt e aventurièr. Es un quinquagenari britanic fondador e president d’una societat d’aviacion als Emirats Arabis Units que crompa e vend d’avions. Aviá ja fach lo torista espacial amb Jezz Bezos dins la nau Blue Origin, çò rapòrtan Vilaweb e The Washington Post.

Harding escriguèt sus Instagram que i aviá amb el dins lo Titan “un parelh d’exploraires legendaris” dont lo comandant naval francés retirat Paul-Henri Nargeolet, qu’Ocean Gate aviá presentat coma un dels “expèrts que pòdon jónher l’expedicion”. Nargeolet es lo director de recèrca sosmarina d’E/M Group, una entrepresa de mejans e exposicions qu’a una filiala, RMS Titanic, consagrada a l’examen del Titanic e a d'exposicions centradas sus aquel transatlantic. Nasquèt a Chamônix (Savòia), cresquèt en Africa e auriá fach unas tres dotzenas de viatges sosmarins.

Tanben i auriá Shahzada Dawood, un entrepreneire paquistanés installat al Reialme Unit, e son filh Suleman.